Chegou Nadal!

  Preparamos o Nadal: montamos e decoramos a árbore e pintamos un mural para a historia que inventamos sobre onde poden acabar todas cando remata o Nadal. (xa vola contaremos!).

   Tamén fixemos grilandas para decorar o cole cos anacos de tea que vos pedimos. 

  

 Costounos traballo pero quedounos unha grilanda moi bonita!

 

  Contamos o conto "Un agasallo diferente". Unha historia de Kalandraka que comeza cun extrano agasallo que en principio deixa decepcionado ao que o recibe, pero que fala da capacidade de Marcel e Tristán (ou calquer neno) para desenvolver a súa imaxinación e disfrutar con calquer cousa sin necesidade de que sexa o xoguete máis caro ou máis moderno.

     Para eles, calquier cousa, neste caso un anaco de tea, pode converterse nunha fonte de diversión e vémolo cada día por exemplo na sala de psico onde da caixa dos retallos saen saias de princesa, capas de superherois, vestidos, tendas de campaña, panos piratas e todo tipo de cousas que inventan sobre a marcha deixando paso á súa creatividade.... 

(nesta montaxe tedes algunhas fotos de como o fixemos todo)

Seguridade viaria: visita da Policía Local

    O pasado venres visitounos unha axente da Policía Local de Ames. A axente Cristina preparounos unhas presentacións en power point para falarnos aos alumnos de 6º de infantil de educación e seguridade viaria. Tratou da importancia de respetar as normas cando andamos polas beirarrúas como peóns ou como ciclistas, o xeito correcto de cruzar e andar polas calles, de xogar nas plazas e porqué é importante o uso do cinturón se imos no coche e dos cascos no caso de ir en bici.... 

   Sobre todo Cristina quixo deixarlles claro que a Policía está para axudarnos se temos un problema e para coidarnos e protexernos. Os nenos asistiron moi interesados e Cristina ensinoulles uns xogos da DXT e fíxolles varias preguntas "a modo de examen". 

   Rematou dándolles unha sorpresa: un carnet de axudante da policía local.  Con ese carnet poderían avisar aos que non cumplen as normas de seguridade viaria e recordarllas....

    Cando rematamos quixeron facerlle moitas preguntas, sobre todo referentes as ferramentas de traballo que levaba: pistolas, barras, esposas, guantes e placa. Quixeron saber o que facía a policía "cos malos", por qué tiñan números diferentes a súa placa e as nosas (Iván fixouse en tódos os números e comparounos). 

 GRAZAS CRISTINA POLA VISITA!

 

 

   Chamoume a atención unha pregunta moi curiosa (ou non tanto) que incidía nos estereotipos de reparto de roles por sexo: "ERES DE VERDADE?". O que a fixo pensaba que o seu uniforme podía ser un disfraz, pero Cristina explicoulles moi ben que as nenas poden ser o que queiran.... Precisamente a este estereotipo corresponde un video que andaba estos días na rede falando da igualdade de xenero dentro dunha campaña que acaba de chegar a España ("Inspirando o futuro: equilibrando a balanza"). No video pídeselles a alumnos e alumnas de 6-7 anos que dibuxen  un ciruxán, un bombeiro e un piloto de cazas  e case todos debuxan homes. Entón reciben a visita de tres profesionais citados...

   

Experiencias de Outono: follas, sementes, arte e matemáticas.

  No outono as follas das árbores caducas que temos diante da nosa ventá (un liquidambar, un carballo americano e un liquidambar) e os que vemos no instituto (liriodendros e liquidambar) ou no monte frente ao colexio (carballos, maceiras e castiñeiros) van adquirindo distintas tonalidades que van desde o amarelo, dourado, laranxa e vermello ata o púrpura máis oscuro. 

  Cada ano vémolas cambiar e sempre nos maravilla este proceso. Saímos a visitar as árbores e a xogar coas follas caídas apreciando as cores, as súas formas, as distintas texturas ao tocalas e o son que fan ao pisalas... A Natureza é unha fonte incrible de materiais para traballar na clase.

   Traballamos todos os sentidos, incluso o olfato, xa que ao traer as follas a clase esta ten agora un recendo outonal... Ao recollelas contamos de cinco en cinco, de dez en dez... e algúns moito máis.

   E fixemos atadiños con elas que empregamos para facer mandalas e unha cortina de follas que está colgada nas nosas ventás. E ademáis, entre todos estamos compoñendo unha poesía sobre as follas.

   Tamén atopamos sementes de arce e recollemos moitas que preparamos para sementar. Na clase contamos as que aportou cada membro dos cinco equipos e fomos anotando todas as cantidades.  Algúns foron moi competitivos,  outros deixáronse levar... e para algúns foi fonte de conflicto, pero para a maioria foi un xeito de aprender o valor da colaboración.

 Outra experiencia que estamos a facer é a plantación de landras de carballos (americanos e autóctonos) e camelias. Contamos un conto ("Aínda nada") que ten moito que ver coa paciencia e a espera e levamos moitos días contabilizando o seu resultado por escrito, xa que cada día comprobamos os cambios e anotamos os días que levamos coa plantación. 

 (nas etiquetas amarelas contabilizamos o tempo das sementes e nas de cor rosa estamos anotando a experiencias das rebanadas de pan e as mans, do que xa vos contaremos como vai indo...)

O Magosto: castañas e música

    A semana pasada celebramos o magosto no colexio: fixemos unha festa onde comimos castañas e bailamos ata cansarnos. Trouxemos o tren das castañas e antes de ilas comer fomos ver como funcionaba. Despois pasamos ao patio cuberto e alí recollimos os nosos paquetes de castañas e estonámolas arredor das papeleiras para deixar todo limpo e recollido.

Despois corremos e bailamos coa música que seleccionamos os profes de infantil sobre o Magosto, Samaín e outono e que se encargou de pinchar o profe de música. Fixen máis videos do baile que podedes ver na web do colexio premendo AQUÍ.

Outono, cabazas e Samaín

   Coma tódolos anos, celebramos o Samaín e pedimos aos nenos e as familias colaboración para decorar cabazas e facer composicións con productos de Outono e a participación coma sempre foi fantástica. moitas gracias a todos!. Saquei fotos de todos os nenos e nenas coas súas cabazas pero por esas cousas que a veces pasan, ao descargalas estropeuseme o ordenador e borráronse moitas. (De todos xeitos nas fotos da exposición saen todas). 

    Tamén subín outros videos das exposicións de cabazas de infantil e primaria e podedes velos premendo aquí  na web do cole.  

    Asistimos as sesións de contacontos organizadas polos departamentos de Extraescolares  e a Biblioteca. A nós tocounos "Antón e as follas"

 Para meternos en ambiente decoramos a clase con cabazas, morcegos e casas encantadas.
 A porta da clase quedounos de medo:

 

Xogos, arte, marmelos e experiencias en outubro

  Durante este mes fixemos varias experiencias. Unha delas foi gastronómico matemática. Resulta que Leo trouxo para compartir un anaco de doce de marmelo que fixo súa nai. (Moitas gracias Cristina: estaba delicioso!). Convertímolo nun problema matemático cortando o marmelo en mitades: tiñan que ir calculando cantos cortes precisabamos para que todos o puderan probar. E sí, ao final deu para todos. Despois lembramos ao pintor Antonio López que tiña no seu xardín unha árbore de marmelos e os pintaba.... e nós fixemos o mesmo.

   Falamos da importancia da auga para os seres vivos: xa comprobamos que a bandexa con cesped e o boniato que tiñamos na ventá estaban secos. Ninguén os regara, claro. (Desde que volvemos e o regamos, o boniato brotou de novo e mide case un metro). Eu mostreilles unha bola que levaba na caixa de materiais da natureza desde que eran pequenos. Curiosamente non lle deran importancia porque pensaban que eran paos secos.... Cando lles dixen que era unha planta viva (unha rosa do deserto) non o creían.  Formularon moitas hipótesis (a base da ciencia) sobre o que podía pasarlle si lle dábamos auga. Metémola  nunha xerra para comprobalo: primeiro flotou sin que lle pasase nada e logo foise abrindo e afundindo ao longo da mañán.... Pode vivir anos aparentemente morta e revivir  coa auga... Aquí levaba tres anos completamente seca!

 Como estamos a traballar a recta numérica, un día convertímonos en números e xogamos a colocarnos en orden ascendente e descendente e  ver quen levaba o anterior e quen o posterior....

Festival de maxia no cole con Roberto e Pedro

   Este luns tivo lugar no noso centro un espectáculo de maxia a cargo dos magos Roberto Lolo e Pedro Bugarín.  Éra unha das actividades do XII Festival de Maxia de Ames que está organizado polo Concello de Ames coa colaboración da Deputación e da Axencia Galega de Industrias Culturais.

     Roberto e Pedro comenzaron as 9.30 con dúas sesións: unha para cinco anos e outra para os de catro e tres na sala de psicomotricidade do edificio de infantil e despois do recreo no salón da Biblioteca para os alumnos de primaria. 

      E nós pasámolo xenial con libros en blanco que encheron de animais e de cores, cartas máxicas e botellas que aparecían e desaparecían. Ademáis, pediron voluntarios e saleu Zoe que bailou e fixoo fantástico como axudante de Roberto!

   Cando volvimos a clase fixemos debuxos dos trucos que máis nos gustaron. 

Nesta montaxe tedes algunhas fotos e debuxos do espectáculo de maxia. 

Recomendacións para o Día das Bibliotecas escolares

  Fai uns días chegounos un recado de Leodoro, o trasno das Biblioteca, que nos pedía participar nunha actividade para o día das Bibliotecas escolares: tíñamos que escoller un libro e deseñar unha nova portada para recomendarllo aos compañeiros e despois expoñelo na Biblioteca.

Agora todas as portadas de infantil e primaria están na Biblioteca e podedes velas premendo neste enlace +

     Fixemos unha votación e, entre os que se contan na clase, escollimos o de "Lobo valiente". En formato A3 e soporte de cartón pluma, cada un fixo un anaco da portada (...un traballo de miniaturistas!) e montámola tipo collage.

 Pero cando a rematamos resultou que poucos compañeiros do centro coñecían o conto e propúxenlles facer outro  dos votados. Saleu  "A cousa que máis doe do mundo" que tamén nos gusta moito. Está cheo de personaxes e animais que  sempre que o contamos nos fan reflexionar sobre a importancia do que decimos. Aparte de ter unha  parte escatolóxica que lles é moi divertida...

   Así que estas son as nosas recomendacións: un coa portada totalmente inventada por eles e outro no que traballamos sobre a portada orixinal do libro.

Visita sorpresa!

     A veces os mestres recibimos sorpresas que son moi moi agradables, sobre todo por vir de rapaces e rapazas que estiveron con nós fai tempo e que son así, expontáneas, emotivas e preciosas,  como esta que levei eu a semana pasada cando se achegaron no recreo unha pandilla de nenos e nenas a facerme unha visita con pancarta e todo!. Moitas gracias!

Horario

     Horario de clase para ter en conta cando temos clases de psicomotricidade (luns e venres) para traer roupa e calzado cómodo e axeitado.

Lembrade tamén que o luns é o Día da froita e que o venres merendamos abaixo, polo tanto é recomendable traer unha sóa peza  (froita ou bocata) para facilitarlles as cousas aos pequenos. Moitas gracias pola vosa colaboración.

Reunión día 19

    Aviso de reunión para o vindeiro martes día 19 ás 5 horas na nosa clase (aula nº 3) para falar de distintos aspectos do curso 2017-18. O resto de horas de reunións podedes velas na web do colexio ou clicando neste enlace.

Un saúdo e vémonos na clase.

Benvidos a un novo curso !!!

    Xa estamos aquí de volta do verán  para iniciar con ilusión e enerxías renovadas un novo curso con algúns cambios: nenos e nenas que se van e aos que botaremos moito de menos, e outros novos aos que lles damos a benvida.

      Póñovos aquí as normas de entrada para os nenos e nenas de infantil para o primeiro día do curso. (Para normas xerais e para as entradas dos de primaria consultade tamén a web do cole premendo neste ENLACE.)

ORGANIZACIÓN DE ENTRADAS PARA O PRIMEIRO DÍA EN INFANTIL 

ALUMNADO DE 4º DE INFANTIL (3 ANOS)

Período de adaptación: segundo o establecido e explicado polo profesorado na reunión informativa.
Durante este período de adaptación non teñen autobús nin comedor escolar.

ALUMNADO DE 5º E 6º DE INFANTIL (4 E 5 ANOS)

Na pista deportiva descuberta, na zona de columnas, haberá indicada unha zona para cada grupo. O profesorado estará en cada columna e cando esté o grupo completo, subirá ao edificio de infantil para incorporarse ás súas respectivas aulas.

Festa de fin de curso

    Para rematar o curso fixemos unha festa. O día antes escolleron o que querían para a merenda e merqueino. Trouxemos globos e xogamos con eles e despois bailamos coa música do Brinca vai de Paco Nogueiras.

    

    Tamén saímos fora a buscar as flores silvestres para o San Xoán  e falamos das tradicións para ese día, as cacharelas con leña de distintas árbores, as flores para preparar auga máxica e perfumada ... e, ao voltar, tomamos un plato de sandía fresca. 

E despois despedímonos ata o vindeiro curso!  Vémonos en setembro!

E non está mal esta PROPOSTA PARA O VERÁN que fixo Carme

                                         despois de escoitar "O verán" de Vivaldi.