Mirando a través das lupas

  Como os bichos e cousas da clase xa as tíñamos algo vistas, saímos fora a observar animaliños e outros elementos naturais. Levamos as lupas e estivemos mirando a través delas. Unha experiencia de búsqueda, observación e conversación sobre o que ibamos atopando.

Debuxar... "e pensar nas musarañas"

 Fixemos unha saída coas "tabletas" para dibuxar o que ibamos atopando. Esta vez quedamos sorprendidos por atopar o que eles pensaron era un ratiño morto no medio do camiño. En realidade tratábase dun animaliño moito máis interesante e dificil de ver: unha MUSARAÑA (en galego, unha CORTA). Un mamífero carnívoro que é dos máis pequenos do mundo e ten un metabolismo moi acelerado polo que precisa estar comendo seguido. É un feroz cazador a pesar dos seus escasos centímetros...

 Estas son as fotos da saída para observar o  entorno e como o dibuxamos: árbores, flores, paxariños, escarabellos, formigas, volvoretas... e por suposto "pensando nas musarañas". 

  As cortas ou musarañas atacan e cazan todo o que sexa máis pequeno que elas e destacan polo seu fociño longo e polos longos peliños sensibles do bigote. Están en perigo de extinción polos cambios no seu habitat e por ser moitas veces confundidas cos ratos. Estivemos vendo o seu corpiño e despois deixámolo na cuneta para que seguise o ciclo da vida... Logo debuxámolo e ao volver a clase buscamos algúns videos para vela en movemento. 

Tarsy Carballas, a científica do solo

 As nenas e os nenos fixemos un lapbook sobre Tarsy Carballas "a científica do solo".  Para conmemorar o "DÍA INTERNACIONAL DA MULLER NA CIENCIA", cada clase tiña que escoller unha científica galega. Ao principio ibamos facer un mural con unha cartulina como soporte, pero según aprendíamos cousas sobre Tarsy as solapas (capas, ventanas ou lapelas) foron aumentando e ao final xa eran catro cartulinas.

 Despois contamos neste video o que averiguamos sobre ela. Algúns con moitos nervios, outros con máis soltura, pero todos acabaron decindo algo sobre Tarsy. Aprendimos moito sobre esta muller que foi unha pioneira na investigación nun tempo no que este campo non se consideraba axeitado para as mulleres... e aínda segue investigando!. E nós, como ela, tamén recollemos moitas mostras diferentes do solo!. Quedámonos sobre todo coa idea que o solo está vivo e agora mírano dun xeito diferente. E tamén nos preocupou moito como lle afectan os incendios tanto ao solo como aos seres vivos que viven nel.

tipos básicos de solo

Paseando polo monte en xaneiro

   O último luns de xaneiro, aproveitando que asomara o sol, fixemos unha das nosas saídas pola contorna. Saír da aula para fomentar a capacidade de observación e aprender sobre a Natureza e o medio meténdonos neles. Esta vez deixamos Castrigo e fomos na dirección contraria, cruzamos polo paso de peóns, revisando e respetando as sinais de tráfico e chegamos ao monte. O primeiro tramo, entre algunhas casas aínda en obras, sorprendeunos pola cantidade de restos de estas: cemento, ferros, plásticos... moito lixo, hasta colgado das árbores. Parecía unha pantasma: a da contaminación!. Pero despois chegamos a unha zona máis interesante O primeiro que atopamos foi un niño de velutinas que caera coa forza do vento. Canto traballan estos bichos!. Atopamos un regato que nos chocou, xa que por un lado estaba "canalizado" daquela maneira e polo outro mantiña o seu bonito aspecto natural orixinal. 

     

 

Logo fomos observando os distintos tipos de árbores polo camiño que transcurre paralelo á autovía. Falamos sobre os toxos, os piñeiros, carballos e eucaliptos que atopamos hasta chegar as enormes mimosas que se ven desde arriba. Observamos as distintas cortezas, tipos de troncos, follas... E aínda querían seguir "investigando" novos recantos. Unha proposta que queda para outro día. 

 

 

As mimosas de Castrigo veñen de Australia!

  Fai unha semana, xusto antes de que cambiase o tempo, aproveitamos o último día de sol para saír a ver as mimosas de Castrigo. Estaban impresionantes e cheas de cor!. Por suposto... todos querían unha ramiña en flor e alá trepamos as profes (a risco de escalabrarnos) para collerlles un cachiño.  E tamén chegou de Australia, coma os eucaliptos, a seta pulpo que descubrimos... e os kiwis!. E nós mándámoslles os toxos, que son alá os invasores!. Cantas cousas temos en común con esa enorme isla-continente do outro lado do mundo!.

 Démoslle unha pequena "poda selectiva" a esta árbore que está catalogada como "invasora". A pesar de ser un risco  maior nos incendios  e de estropear a fertilidade do chan,  pretende compensar esto coa súa espectacular floración que chama a atención polo medio dos montes.

    

Curioseando, atopamos un recanto (espectacular, dentro da súa sinxeleza) onde o chan estaba cuberto de follas de carballos e salgueiros e pudemos escoitar varios tipos de paxaros. Agochaba un pequeno curso de auga que nos dou pé a lembrar a Rosalía e o seu "adiós ríos, adiós fontes, adiós regatos pequenos". (E sorprendeunos moito ver que, incluso alí, chegaba a contaminación en forma dunha morea de plásticos e envases e lembramos o traballo de reciclado e separación do lixo do curso pasado...).

 

Unha clase de coñecemento no monte

Fixemos unha nova saída cos nenos polo monte cercano ao cole. Unha clase de coñecemento no medio da natureza: vimos insectos, plantas, cogumelos, liques, paos, landras, piñas... e intentamos localizar paxaros observando e escoitando. Foi a actividade máis dificil: intentar gardar silencio e concentrarnos para escoitar o son das follas movidas polo aire e os paxaros...  E coma sempre queríamos traelo todo!.

 Tamén sairon os nenos de outro grupo de 5 anos. E nós íbamos de guías...

Visitando o muiño-lavadoiro da Aldea de Castrigo

 Este curso imos precisar facer moitas máis sesións ao aire libre. Unha delas xa é habitual ao longo de moitos anos: a visita á Aldea de Castrigo e a súa zona de muiño e lavadoiro. Unha zona que nos mostra as actividades realizadas durante xeracións, os modos de vida dos antergos... Ademáis está a carón do colexio e disfrutamos dun fermoso paseo entre camiños, leiras e monte observando os cambios estacionais...

  Outro clásico deste paseo que tanto disfrutan é a recollida de canta landra, pao, pedriña e folla atopan.... Cando volvimos estaban felices cos petos cheos!. (E pronto teremos unha sorpresa relacionada con esta zona!!!)

 

Os alfabetos creativos de Abril

Abril estivo traballando co alfabeto. Ten unha libreta con lentejuelas que cambian de cor cando as xiras... como esas camisetas que lles encantan  😉. Estaba facendo a súa inicial e Andrés propúxolle que fixera todo o abecedario. Foille sacando fotos a cada letra e quedoulle así:

 Despois  envioume este outro que fixo recortando os cartóns de caixas de comida que van gardando para reciclar!. Fantástico. Unha moi boa idea para REUTILIZAR materiais que xa tiña na casa!

 Recordade que na clase estivemos moito tempo facendo un proxecto de separación de residuos (tíñamos tres papeleiras nas que cada día clasificábamos e repartíamos os restos de papel, o plástico e os residuos orgánicos das merendas.  Falamos da Reciclaxe, que xunto coa Reducción (hai moitas cousas que non necesitamos) e coa Reutilización  (que foi o que fixo Abril cos cartóns)  son as tres R que poden axudar a coidar o planeta. Póñovos aquí este corto para que o lembremos.

 

Un paseo polo parque con Maeba.

Maeba e Gael foron de paseo polo parque do río e ela lembrouse de que fora alí onde o ano pasado puxemos as placas de pizarra decoradas con poemas. As que todos os alumnos do Concello escribiron e decoraron con moito esforzo e cariño para conmemorar o Día de Rosalía. Por desgracia xa quedan moi poucas, pero ela explicouno así: "mamá, seguro que las quitaron para que no viniera el coronavirus". Aparte de eso diron un refrescante paseo por este bonito parque de Bertamiráns.  Sandra cóntoume que Maeba bota moito de menos aos seus compañeiros. Eu tamén, un bico a todos!

Iago: abellas e un minimundo mariño

Iago estivo traballando coa proposta dos animais e onde viven. El dedicouse ás abellas, escribeu unha ficha coa descripción deste insecto imprescindible para a nosa supervivencia, que o 20 de maio tivo o seu día mundial, fixo varias con plastilina e limpapipas e construeu panales con oveiras. 

 Contou coa axuda dun experto, o seu avó, que tivo abellas e conserva algún panal como o da foto. Levou a Iago a buscar as flores para ver como as abellas collían o polen para facer o mel.

E así lle quedou esta colmea e as abellas!

 Por outro lado, para crear os minimundos, Nuria contoume que Iago escolleu os  animais do mar xa que lle gusta moito saber acerca deles, coñece os tipos de baleas, de golfiños e os peces que viven nos mares dos trópicos. Aproveitaron para ver a película de “Buscando a Dory” e fixeron un minimundo marino cun acuario que tiñan na casa. E remataron cun chapuzón na piscina!

Saídas por Castrigo

  Para observar a natureza e os cambios que provoca o outono fixemos un par de  saídas polas pistas de Castrigo cerca do colexio. Vimos carballos que xa cambiaban de cor, castiñeiros, maceiras, follas, buscamos landras, castañas, ourizos... A nosa idea era recoller landras para sementar,  pero atopamos moi poucas e bastante estragadas así que descartamos a maioría. Cando volvemos a clase gardamos moitas das cousas que atopamos nunha pequena caixa dos tesouros de outono.   

 

    O encargado do día levou unha  bolsa onde íbamos gardando as sementes e follas que quixemos levar a clase.  

    Foi unha saída para coñecer o entorno, fomentar a observación e promover o respeto polos seres vivos.   

 

Visitamos o Pazo do Faramello

  Fixemos unha saída ao Pazo do Faramello no Concello de Rois. O seu dono, Gonzalo Rivero de Aguilar, ensinounos o xardín e fixo con nós un recorrido polo entorno. Falounos da antiga fábrica de papel que foi orixe do pazo e da labor de recuperación e reforestación do entorno con especies autóctonas que son máis resistentes ao lume.

   Cada recanto que vimos era precioso!

  Despois dunha longa camiñata volvimos ao Xardín do Recordo e  merendamos coas familias que nos estaban esperando: foi unha xornada moi especial!.

  Coa axuda dos pais plantamos no Xardín do Recordo,  en memoria das víctimas do Alvia, os  tres árbores do amor (cerquis siliquastrum) que mercou o colexio. 

   E mentras xogamos pola beira do río atopamos brotes e canas de bambú xigante.... Co permiso de Gonzalo creo que levaron as mochilas cheas de brotes e anacos de canas. Estaban moi emocionados. Despois do traballo que fixeramos para o libro agora ven bambús por todas partes!

Unha montaxe coas fotos que saquei durante a visita ao Pazo....

máis visitas de nais !

  Estos días tivemos moitas visitas na clase: Marisa a nai de Adriana veunos ler o libro ABEZOO   un libro de poemas  e rimas con animais para todas as letras do abecedario e do que lles encantou o do "Wasinfeo"  un animal fantástico feito de anacos de outros... E regalounos o libro para a biblioteca da clase!

     Alexia, a nai de Candela, veunos ensinar a facer bonecas con pompóns de lá e paso a paso entre as dúas fixeron unha. Voltas e voltas de lá, cortar, trenzar coa axuda de Candela para facer as pernas e limpapipas para os brazos e ollos de gomets. Despois escollimos un nome e chámase Alexia!

    Bea, a nai de Noa, veunos ler unha historia de Pupi e Nachete, "Pupi e os pantasmas" de María Menendez, un personaxe extraterrestre do que moitos xa teñen oido falar aos seus irmáns maiores porque é a mascota de algunhas clase de primaria.

    E Marta, a nai de Álvaro, veunos contar unha parte moi interesante do seu traballo. Pasou a noite observando morcegos de ferradura e foi controlar como se recupera o Monte Pindo de Carnota despois dos incendios que o arrasaran fai uns anos. Ensinounos fotos dalgunhas especies protexidas que atopou no monte e nos regos (a lagartixa rabilarga, a saramanga,  anguías...).      Despois tamén  falamos de que como temos que coidar o medio ambiente, e do que podemos facer nós cada día  . Intentando falar de un en un,  foron decindo cousas como aforrar auga cando lavamos os dentes, tirar as pilas nos contenedores axeitados, recoller o lixo e empregar sempre sempre as papeleiras...

MOITAS GRAZAS A TODAS!